İRAQDA SEÇKİLƏR
Səfir Rino Harnişin məqaləsi

27 yanvar, 2005

Yanvarın 30-u Səddam Hüseyn əsarətindən azad olmalarından bir il on ay sonra, İraqlıların əksəriyyətinin arzu etdiyi azad və demokratik cəmiyyətin qurulması işində ilk həlledici addım kimi seçkilər keçiriləcəkdir. İraq boyu və dünyanın müxtəlif nöqtələrindəki seçki məntəqələrində İraq vətəndaşları öz səslərini verərək, İraqın demokratikləşməsi prosessinə şəxsi paylarını vermiş olacaqlar. 30 illik repressiya vahiməsindən, işkəncə və qətllərdən sonra İraq xalqı öz həyat və gələcəyinə görə nəhayət ki özü məsuliyyət daşıyacaqdır.

Bu seçkilər, əvvəldən axıradək, İraqlılar tərəfindən və İraqlılar üçün keçirilir. İraqın Müstəqil Seçki Komissiyası Milli Keçid Assambleyasında 275 yer uğrunda mübarizə aparacaq təxminən 111 partiya, koalisiya və fərdi namizədləri təsdiq etmişdir. Bu Assambleya prezident və iki vitse-prezidenti seçəcəkdir ki, onlar da öz növbəsində ölkənin Baş nazirini təyin edəcəklər. Milli Keçid Assambleyası həmçinin 2005-ci ilin oktyabr ayında xalq referendumuna çıxıralacaq Konstitusiya layihəsini hazırlayacaqdır. 2005-ci ilin dekabr ayında İraqlılar yenidən seçki məntəqələrinə qayıdaraq, yeni konstitusiyaya uyğun milli hökuməti seçəcəklər.

30 yanvar seçkilərində İraqlılar həmçinin İraqın 18 əyalət şurasına və Kürd Milli Assambleyasına nümayəndələr seçərək, İraq cəmiyyətinin demokratiyanın daha da dərinləşməsinə nail olmuş olacaqlar.

Hazırda İraq üçün taleyüklü məsələ həll olunmaqdadır və hamı bunu dərk edir. Rəy sorğuları İraqlıların əksəriyyətinin seçkilərdə iştirak etmək istədiyinə dəlalət etsə də, azad, sabit və firavan İraqın düşmənləri elə güman edirlər ki, bu gələcəkdə onlar üçün yer yoxdur. Onların qəzəbi maşında bomba parlayışları, qətllər, insan oğurluğu və qorxutmə hallarında özünü büruzə verir. Təəsüf ki, seçkilər yaxınlaşdıqca, zorakılıq da arta bilər. Səsvermə hüququ olan hər bir şəxs din və etnik mənsubiyyətindən asılı olmayaraq seçimini etməlidir – ya ölkəni müstəqillik yolu ilə irəli apararaq, səsvermədə iştirak etmək, yaxud da İraqın gələcəyini təhlükə altına almaq istəyənlərin hədə və qorxusuna baş əymək.

İraq seçkilərə yaxınlaşdığı bir vaxt dünyanın müxtəlif yerlərində yaşayan adamlar adi İraqlılarda ruh yüksəkliyi müşahidə etməkdədirlər. Həqiqi İraq vətənpərvəri o adamlardır ki, hər səhər işə yollanaraq, ölkənin işıqlı gələcəyi naminə çalışırlar. Bu o adamlardır ki, həmkarlarının oğurlanması və qətlə yetirilməsinə baxmayaraq, polis işçisi və milli qvardiyaçı olmaq üçün növbə gözləyirlər. Bu o adamlardır ki, bir gün əvvəl kamikadzelərin günahsız adamları qətlə yetirdikləri yoxlama məntəqələrinin yanından ötərək işə gedirlər. Bu, həmin İraqlılardır ki, yetim uşaqların qayğısına qalır, kanalizasiya sistemini bərpa edir, elektrik stansiyaları qurur, yeni yollar salır, məktəblərdə dərs deyir və daha parlaq gələcək üçün çalışırlar. Seçkilər yolu ilə öz ümid və arzularını həyata keçirməyə çalışan bu adamlar bütün dünyanın hörmət, rəğbət və dəstəyinə layiqdirlər.

İraqlıların əksəriyyətinin demokratiya qurmaq arzusu dəyanət və səbir tələb edəcəkdir. Bu, seçkiləri təxirə salmaq istəyənlərə müqavimət göstərmək bacarığı tələb edəcəkdir. Bu mərhələdə seçkiləri təxirə salmaq – dağıdıcı qüvvələri ruhlandırmaq deməkdir. Uğurlu seçkilər isə bu qüvvələrə ciddi zərbə vurmaq deməkdir. Əgər İraq xalqı demokratik İraq naminə səsvermədə iştirak etmək üçün özündə cəsarət tapırsa, biz də eyni dəyanət nümayiş etdirərək, demokratiyaya keçid yolunda atılan bu səyləri dəstəkləməliyik.